ඉරෙන් හඳෙන්

ඉරෙන් හඳෙන් එළිය අරන්

ගහෙන් වැලෙන් සුවඳ අරන්

ඇලෙන් දොලෙන් සිසිල අරන්

අපට සැදුන අපේ ලෝකයේ

සතුටු වෙන්න එන්න යාලුවේ....

සමනල තටු සිඳින්නෙපා

පාට මැකී යයි දේදුන්නේ

ගහවැල සිඳි දමන්නෙපා

පොළොව දැවී යයි ඉර ගින්නේ

අපට සැදුනු අපේ ලෝකයේ

සතුට සදා රකිමු යාලුවේ..//

නටා ගයා බටිති මලිත්තෝ

අපා දෙපා සිව්පා ඇත්තෝ

ඉරේ හඳේ ගහේ වැලේ

අපි වගේම උරුමය ඇත්තෝ

අපට සැදුන අපේ ලෝකයේ

සතුට බෙදා ගනිමු යාළුවේ..//